वैशाख ३, काठमाडौं । नेपालमा विगत २४ घण्टामा १४ जनामा कोरोना भाइरसको संक्रमण पुष्टि भएको छ ।
स्वास्थ्य तथा जनसंख्या मन्त्रालयका अनुसार उक्त अवधिमा ३ हजार ३० जनामा गरिएको पीसीआर परीक्षणमा १४ जनामा संक्रमण पुष्टि भएको हो । उक्त अवधिमा ८७३ जनामा गरिएको एन्टिजेन परीक्षणमा भने कसैलाई पनि कोरोना संक्रमण नदेखिएको मन्त्रालयले बताएको छ ।
उक्त अवधिमा ५५ जना कोरोना भाइरस संक्रमणमुक्त भएका छन् । हाल मुलुकभर ४३८ जना सक्रिय संक्रमित रहेका छन् ।
कोभिड महामारी अन्त्य हुन लागेको हो त ?
कोभिड महामारीको एक वर्षअघिको दोस्रो लहरयता शनिवार सक्रिय संक्रमितको सङ्ख्या ५०० भन्दा कम पुगेको हो। यो अवस्थालाई कतिपय स्वास्थ्य अधिकारीहरूले अव सजगतापूर्वक सामान्य जनजीवन कायम राखेर अगाडि बढ्नुपर्ने बताएका छन् ।
तर उनीहरु छिमेकी देशहरूमा नयाँ भेरिएन्ट देखिएको र संक्रमितहरुको संख्या उच्च रहेको अवस्थामा नेपालमा समेत ह्वात्तै बढ्न सक्ने जोखिम कायम रहेको बताउँछन्।
मन्त्रालयका अनुसार नेपालमा १८ वर्ष वा सोभन्दा माथिको लक्षित जनसंख्यामा करीब ९४ प्रतिशतले कोभिड खोपको कम्तीमा एक मात्रा लगाएका छन् भने ८३ प्रतिशत जतिले पूर्ण मात्रामा खोप लगाएका छन्।