काठमाडौं । बुधवार दुई सातायताकै सस्तो भएकाे डलर बलियो बन्ने संकेत देखिएको छ । वाणिज्य बैंकहरूले राष्ट्र बैंकभन्दा बढी मूल्य तोकेपछि डलर बलियो बन्ने संकेत देखिएको हो ।
गत मंगलवारसम्म नेपाल राष्ट्र बैंकभन्दा सस्तोमा डलर बेच्ने गरेका वाणिज्य बैंकहरूले बुधवार (आज) महँगोमा बेचिरहेका छन् ।
राष्ट्र बैंकले बुधवारका लागि अमेरिकी डलरको खरीद दर १३१ रुपैयाँ २१ पैसा र विक्री दर १३१ रुपैयाँ ८१ पैसा तोकेको छ । यो पछिल्लो दुई सातायताकै सस्तो हो । दुई साताअघि गत फागुन ३० गते डलरको विक्री दर १३० रुपैयाँ ७० पैसा थियो ।
बुधवार सिद्धार्थ बैंकबाहेक अन्य सबै बैंकले तोकेको डलरको विक्री दर राष्ट्र बैंकभन्दा बढी छ । सिद्धार्थ बैंकले आजको डलरको विक्री दर १३१ रुपैयाँ ८० पैसा तोकेको छ । अन्य बैंकहरूले भने आज १३१ रुपैयाँ ९५ पैसासम्ममा डलर विक्री गरिरहेका छन् ।
यस्तै प्राइम बैंकमा डलरको मूल्य सबैभन्दा महँगो छ । बैंकले १३१ रुपैयाँ ९५ पैसामा डलर विक्री गरिरहेको छ । बैंकले बुधवार १३१ रुपैयाँ ३५ पैसामा डलरको खरीद गरिरहेको जानकारी दिएको छ ।
यस्तै सानिमा, एभरेष्ट, सनराइज र स्ट्याण्डर्ड चार्टर्ड बैंककाे प्रतिडलर विक्री दर १३१ रुपैयाँ ८५ पैसा र खरीद दर १३१ रुपैयाँ २५ पैसा छ ।
एनएमबी बैंकले १३० रुपैयाँ ६४ पैसा तिरेर १ डलर किनिरहेको छ भने १३१ रुपैयाँ ९० पैसामा १ डलर विक्री गरिरहेको छ । बाँकी बैंकले १ डलर १३१ रुपैयाँ ९० पैसामा विक्री गरिरहेका छन् भने १३१ रुपैयाँ ३० पैसामा खरीद गरिरहेका छन् ।
गत मंगलवार राष्ट्र बैंकले डलरको विक्री दर १३२ रुपैयाँ १० पैसा र खरीद दर १३१ रुपैयाँ ५० पैसा तोकेको थियो ।
.jpg)
