मंसिर २७, काठमाडौं । इन्टरनेट सेवा प्रदायक वर्ल्डलिंक कम्युनिकेसन्सले डिजिटल वालेट खल्तीको शेयर स्वामित्व किनेको छ ।
अब भुक्तानी सेवा प्रदायक खल्तीमा वर्ल्डलिंकको ४० प्रतिशत स्वपूँजी स्वामित्व रहनेछ । ७७ ओटै जिल्लामा इन्टरनेट सेवामार्फत सुविधा पुर्याइरहेको वल्र्डलिंकले दुर्गम र ग्रामीण क्षेत्रमा वित्तीय पहुँच पुर्याउने लक्ष्यसहित खल्तीमा लगानी गरेको बताएको छ ।
‘खल्तीले नेपालमा वित्तीय पहुँच र वित्तीय समावेशिताको लागि पनि काम गरिरहेको छ । वर्ल्डलिंक र खल्तीको यो साझेदारीले शहरीसहित ग्रामीण क्षेत्रमा पनि वित्तीय पहुँच पुर्याउनको लागि सहयोग पुग्ने विश्वास छ,’ वर्ल्डलिंकले विज्ञप्तिमार्फत् भनेको छ ।
२५ वर्षअघि स्थापना भएको वर्ल्डलिंकले पछिल्ला वर्ष नेपालका ग्रामीण क्षेत्रमा सेवा विस्तार गरी दुर्गम क्षेत्रलाई पनि ईन्टरनेट कनेक्टिभिटीमा जोडिरहेको छ ।
‘वर्ल्डलिंकले नेपालको शहरी क्षेत्रसहित ग्रामीण तथा दुर्गम क्षेत्रमा इन्टरनेटको सेवा विस्तार गरिरहेको छ,’ वर्ल्डलिंकका अध्यक्ष दीलिप अग्रवालले भने, ‘यो सहकार्य नेपालको सूचना प्रविधि सुदृढीकरणको लागि कोसेढुङ्गा साबित हुनेछ ।’
खल्तीसँगको सहकार्यले नेपालका दूरदराजका क्षेत्रमा इन्टरनेट कनेक्टिभिटीसँगै वित्तीय पहुँच पुर्याउन र डिजिटल नेपालको लक्ष्य हासिलको लागि यसले मद्दत पुर्याउने उनले बताएका छन् । स्वदेशी लगानीकर्ताले स्वदेशी स्टार्टअपमा लगानी गरेको यो उदाहरण आगामी दिनमा अन्य लगानीकर्ता र उदाउँदा स्टार्टअपको लागि आशाको संकेत भएको उनले टिप्पणीले गरेका छन् ।
‘यसले नवीन सोचसहित नवीन काम गरिरहेका स्टार्टअपहरुको लागि स्वदेशमै लगानी जुटाउन सकिने विश्वास बढाउने छ’, अग्रवालले भने,’डिजिटल नेपालको लक्ष्य साकार पार्न सहयोग पुर्याउने नवीन सोचहरुलाई सघाउन वर्ल्डलिंक सधैं तत्पर रहनेछ ।’
भुक्तानी सेवा प्रदायक र स्वदेशी रेमिटेन्स सेवा सञ्चालनको लागि पाँच वर्ष अघि अनुमति पाएको खल्ती डिजिटल वालेट सन् २०१७ देखि सेवा प्रदान गर्दै आईरहेको छ । वर्ल्डलिंकको लगानीले सबैको लागि वित्तीय पहुँच पुर्याउने खल्तीको योजना साकार पार्नको लागि सहयोग पुग्ने खल्तीका सहसंस्थापक अमित अग्रवालले बताए ।
वर्ल्डलिंकबाट लगानी भित्रिएसँगै वित्तीय पहुँचमा सबैको सुनिश्चितताको लागि खल्तीले काम गर्ने उनले बताए । मुलुकभर खल्तीका २० लाख बढी नियमित प्रयोगकर्ता रहेको बताइएको छ ।