काठमाडौं । नेपाल धितोपत्र बोर्डको अध्यक्ष छनोटका लागि पुनः आवेदन खुला भएको छ ।
विवादास्पद बनेको यसअघिको समितिलाई सरकारले रद्द गर्दै नयाँ बनाएसँगै नेपाल धितोपत्र बोर्ड अध्यक्ष छनोट समितिले सूचना जारी गरेर बोर्डको अध्यक्ष छनोट गर्न १५ दिनको समय दिँदै दरखास्त आह्वान गरेको हो ।
धितोपत्र बोर्डमा रिक्त अध्यक्ष पदमा खुला प्रतिस्पर्धाद्वारा पदपूर्ति गरिने भएकाले योग्यता पुगेका इच्छुक नेपालीले अर्थ मन्त्रालयको वित्तीय क्षेत्र व्यवस्थापन तथा संस्थान समन्वय महाशाखामामार्पmत आवेदन दिन सक्नेछन् । यसअघि आवेदन दिएकाहरूले पुनः आवेदन दिनुपर्नेछ । धितोपत्रसम्बन्धी ऐन, २०६३ बमोजिम योग्यता पुगेको, उच्च नैतिक चरित्र भएको, कम्तीमा स्नातकोत्तर उपाधि प्राप्त गरी धितोपत्र बजार व्यवस्थापन, पूँजी बजार विकास, आर्थिक, वित्तीय, वाणिज्य, व्यवस्थापन या कानून क्षेत्रमा कम्तीमा ७ वर्षको पेशागत अनुभव प्राप्त गरेको नेपाली नागरिकले आवेदन दिन सक्ने व्यवस्था छ ।
यसअघि मन्त्रीस्तरीय निर्णयबाट १९ असोजमा बोर्डको अध्यक्ष नियुक्तिका लागि तीन सदस्यीय छनोट समिति गठन गरिएको थियो । १३ मङ्सिरमा बसेको मन्त्रिपरिषद् बैठकले फेरि अर्काे समिति गठन गर्ने निर्णय गरेको थियो । त्यसपछि उक्त समिति विवादस्पद बनेको थियो ।
नयाँ छनोट समितिमा पनि योजना आयोगका उपाध्यक्ष पौडेल नै संयोजक छन् । मन्त्रिपरिषद्को निर्णयबमोजिम अर्थ मन्त्रालयले छनोट समिति गठनका लागि अर्थ हेर्ने सदस्यको नाम तोकी पठाउन योजना आयोगलाई पत्र लेखेको थियो । आयोगले गत आइतवार आयोगका उपाध्यक्ष पौडेलले नै अर्थ मामिला हेर्दै आएको पत्र अर्थ मन्त्रालयलाई पठाएको थियो ।
पौडेलको संयोजकत्व गठन गरिएको छनोट समितिका सदस्यमा अर्थसचिव मधुकुमार मरासिनी र विज्ञ सदस्यमा नेपाल स्टक एक्सचेन्जका पूर्वअध्यक्ष जीवनाथ धिताल छन् ।
बोर्डका कार्यकारी निर्देशक नीरज गिरी र उपकार्यकारी निर्देशक डा. नवराज अधिकारी, नेपाल स्टक एक्सचेन्जका पूर्वप्रमुख कार्यकारी अधिकृत सीताराम थपलिया, बीमा समितिका पूर्वअध्यक्ष चिरञ्जीवी चापागाईं, नेपाल राष्ट्र बैंंकका पूर्वकार्यकारी निर्देशक डा. गोपाल भट्ट, कर्मचारी सञ्चय कोषका पूर्वप्रशासक कृष्णप्रसाद आचार्यले बोर्डको अध्यक्षका लागि आवेदन दिएका थिए । यस्तै, हेमन्त बस्याल, केशवप्रसाद श्रेष्ठ, अनिल पौडेल, रमेश हमाल, जीवन अमगाईं र अम्बिका लामिछानेले बोर्डको अध्यक्षका लागि यसअघि आवेदन दिएका थिए । नयाँ प्रक्रिया शुरू भएसँगै यसअघि बोर्डको अध्यक्ष बन्न आवेदन दिएका १२ जनाको सबैको आवेदन रद्द भएको छ । अब अध्यक्ष पदमा प्रतिस्पर्धाका लागि उनीहरूले फेरि आवेदन दिनुपर्नेछ ।
सर्वाेत्तम सिमेन्टको शेयर खरीद प्रकरणका कारण भीष्म ढुंगाना बर्खास्त भएपछि बोर्ड नेतृत्वविहीन छ ।
