अझै पनि खुला आकाशमुनि पढ्न बाध्य छन् बालबालिका

शुक्लाफाँटा राष्ट्रिय निकुञ्जबाट ७०० बढी परिवारले छोडे शिविर

कञ्चनपुर । तत्कालीन शुक्लाफाँटा वन्यजन्तु आरक्षबाट विस्थापनमा परेका ७०० भन्दा बढी परिवार वासस्थानको खोजीका लागि बस्दै आएको शिविर छाडेर शुक्लाफाँटा नगरपालिका–११ स्थित श्रीकृष्ण सामुदायिक वन क्षेत्रमा पुगेका छन् । शनिवार साँझ आइपुगेका ती परिवारलाई सुरक्षाकर्मीले गन्तव्यमा जान नदिएपछि खुला आकाश अनिदोमै रात काटेका छन् । शुक्लाफाँटा नगरपालिका–११ स्थित रुखमुनि बालबालिका बोकेर पुगेका विस्थापित परिवारले रात काटेका हुन् । शुक्लाफाँटा राष्ट्रिय निकुञ्जको ढक्का, तारापुर र लल्लरे डाँडा शिविरमा बस्दै आएका विस्थापित ७७२ परिवार भौंतारिंदै वासस्थानको खोजी गर्दै यहाँ आइपुगेका हुन् । ओढ्ने बिछ्याउने कपडासँगै केही दिनका लागि पुग्ने खाद्य सामग्री बोकेर विस्थापित परिवार यहाँ आइपुगेका छन् । निकुञ्ज क्षेत्रमा बस्दै आएका शिविरमा सुरक्षाको वातावरण नभएपछि बाध्य भएर यहाँ आइपुगेको आरक्ष सङ्घर्ष समितिका अध्यक्ष हिरासिंह भण्डारीले बताए । ‘निकुञ्जबाट छिर्ने हात्तीलगायतका जनावरबाट दुई जनाले ज्यान गुमाए,’ उनले भने, ‘असुरक्षित भएपछि शिविर छाड्न बाध्य भयौँ । मुआब्जाको पनि कुनै प्रक्रिया अघि बढेको छैन । खाने लगाउने अवस्था नै नरहेपछि यहाँ आउन बाध्य भयौँ ।’ उनले बस्दै आएको छाप्रो भत्केमा निकुञ्ज प्रशासनले बनाउन नदिएकाले शिविर छाडेर हिँड्नुपरेको दुःखेसो पोखे ।   आरक्ष विस्तारका क्रममा विस्थापनमा परेपछि विसं २०६४ देखि विभिन्न शिविरमा बस्दै आए पनि सुनवाइ हुन नसकेको उनले गुनासो गरे । आफूहरूले वनजंगल विनाश हुन नदिने उल्लेख गर्दै भण्डारीले सरकारले व्यवस्था नगर्दासम्म आरक्ष विस्थापित परिवारको बसोबासका लागि बेलडाँडीस्थित प्रगति सामुदायिक वन क्षेत्रमा बस्ने बताए । रासस