पहिलो पटक घट्यो हुवावेईको आम्दानी, मुनाफामा चाहीं उच्च वृद्धि

चैत १५, काठमाडौं। चिनियाँ दूरसञ्चार उपकरण निर्माता कम्पनी हुवावेईको आम्दानी पहिलो पटक घटेको छ । अमेरिकाले कम्पनीमाथि लगाएको प्रतिबन्धका कारण आम्दानीमा कमी आएको हो ।  सन् २०२१ मा कम्पनीले ६ खर्ब ३६ अर्ब ८० करोड युआन (९९ अर्ब ९० करोड डलर) आम्दानी गरेको छ । सन् २०२० को तुलनामा यो २८ दशमलव  ५ प्रतिशत कम हो । हुवावेईको आम्दानी घटेको यो कम्पनीले आर्थिक प्रतिवेदनहरु सार्वजनिक गर्न थालेयता पहिलो पटक हो ।  कम्पनीकी प्रमुख वित्तीय अधिकारी मङ वान्चाउका अनुसार अमेरिकाले लगाएको प्रतिबन्ध, आपूर्तिमा देखिएको चुनौती र चीनमा फाइभ जीको मागमा आइरहेको सुस्ती आदिका कारण आम्दानी घटेको हो । अमेरिकाका पूर्व राष्ट्रपति डोनल्ड ट्रम्पको पालामा  हुवावेईलाई कालो सूचीमा राखिएको थियो । अमेरिकाले लगाएको प्रतिबन्धका कारण विश्वको स्मार्टफोन बजारमा हुवावेईको हिस्सा घटेको छ ।  आम्दानी घटेको भएपनि गत वर्ष कम्पनीको मुनाफा भने बढेको छ । गत वर्ष कमपनीको खूद मुनाफा १ खर्ब १३ अर्ब ७० करोड युआन रहेको छ । यो सन् २०२० को तुलनामा ७५ दशमलव ९ प्रतिशत धेरै हो । हुवावेई पब्लिक कम्पनी होइन । तर यसले वार्षिक आर्थिक प्रतिवेदन सार्वजनिक गर्ने गरेको छ । एजेन्सी