जेठ १०, चितवन । भरतपुर महानगरपालिकाको मेयर पदमा सत्तारूढ गठबन्धनको तर्फाबाट उम्मेदवार नेकपा माओवादी केन्द्रकी उम्मेदवार रेनु दाहाल विजयी भएकी छिन् ।
दाहालले नेकपा एमालेका उम्मेदवार विजय सुवेदीलाई १२ हजार ४४९ मतान्तरले पराजित गरेकी हुन् ।
उपमेयरमा सत्तारूढ गठबन्धनको तर्फबाट नेपाली कांग्रेसका चित्रसेन अधिकारी विजयी भएका छन् । चित्रसेन एमालेले समर्थन गरेको राप्रपाकी हिमला गुरूङको २२ हजार १९१ को फराकिलो मतान्तरले पराजित गरेका हुन् ।
महानगरपालिकाको २९ ओटा वडाहरुमध्ये नेपाली कांग्रेसले १६ ओटा वडामा जित हासिल गरेको छ भने नेकपा एमालेले ६ वटा वडामा जित प्राप्त गरेको छ ।
यस्तै नेकपा माओवादी केन्द्रले ३ ओटा वडा तथा नेकपा (एकीकृत समाजवादी)ले ३ वटा वडा जित्न सफल भएको छ । वडा नम्बर २५ मा भने वडाध्यक्ष पदमा स्वतन्त्र उम्मेदवार छबिलाल सापकोटा विजयी भएका छन् ।