विश्व अर्थतन्त्र ६ % ले बढ्ने आईएमएफको अनुमान

साउन १३, न्यूयोर्क (अमेरिका) । यस वर्ष विश्व अर्थतन्त्र ६ प्रतिशतले बढ्ने अनुमान अन्तरराष्ट्रिय मुद्रा कोषले गरेको छ । कोरोनाभाइरसको महामारीका कारण उत्पन्न आर्थिक मन्दीबाट विश्वको धनी देशहरु विशेषगरी अमेरिकामाथि आउन थालेसँगै विश्वको आर्थिक परिदृश्य सुध्रिएको कोषले बताएको हो । कोरोनाभाइरसको संक्रमण विरोधी खोप लगाउन संघर्षरत गरिब देशहरुको वृद्धि प्रक्षेपण भने कोषले कटौती गरेको छ ।  समग्रमा विश्व अर्थतन्त्र यस वर्ष ६ प्रतिशतले बढ्ने बताइएको छ । यो अप्रिलमा गरिएको प्रक्षेपणकै यथावत् हो । गतवर्ष भने महामारीका कारण विश्व अर्थतन्त्र ३ दशमलव २ प्रतिशतले खुम्चिएको थियो । प्रक्षेपण साकार भएमा यो विश्व अर्थतन्त्रमा सन् १९८० यताकै उच्च वृद्धि हुने छ ।  यद्यपि खोप कार्यक्रममा देखिएको असमानताका कारण आर्थिक वृद्धिदरमा विषमता देखिएको छ । विकसित अर्थतन्त्र यस र्वा ५ दशमलव ६ प्रतिशतले बढ्ने अनुमान छ । अप्रिलमा गरिएको प्रक्षेपणमा यो दर ५ दशमलव १ प्रतिशत रहने बताइएको थियो । उदीयमान बजार र विकाशिल अर्थतन्त्रको वृद्धि प्रक्षेपण यस अघिको तुलनामा शून्य दशमलव ४ प्रतिशतले घटाएर ६ दशमलव ३ प्रतिशतमा झारिएको छ । धनी र गरिब देशहरु बीच खोपमा देखिएको असमानता पुर्न धेरै गर्न जरुरी रहेको कोषकी प्रमुख अर्थशास्त्री गिता गोपिनाथले बताइन् ।  महामारी विश्वभरबाटै पराजित नभएसम्म पुनःबहाली सुनिश्चित नहुने उनको भनाइ छ । गरिब देशहरुलाई खोपको १ अर्ब मात्रा उपलब्ध गराउने वाचा तत्कालै पूरा गर्न पनि उनले धनी देशहरुलाई अनुरोध गरेकी छिन् । यस वर्ष अमेरिकी अर्थतन्त्र ७ प्रतिशतले बढ्ने अनुमान गरिएको छ । यो दर अप्रिलमा गरिएको प्रक्षेपणको तुलनामा शून्यदशमलव ६ प्रतिशत बढी हो ।  सन् २०२१ मा यूरोजोन ४ दशमलव ६ प्रतिशतले बढ्ने प्रक्षेपण गरिएको छ । जापानी अर्थतन्त्रमा २ दशमलव ८ प्रतिशतको वृद्धि आउने अनुमान छ । चीनको अर्थतत्र ८ दशमलव  ज्ञप्रतिशत र भारतीय अर्थतन्त्र साढे ९ प्रतिशतले बढ्ने कोषको प्रक्षेपण छ । एजेन्सी