वर्तमान अवस्थामा आइपुग्दा एउटा स्वतन्त्र संवैधानिक निकायको रूपमा लोकसेवा आयोगको व्यवस्था गरिएको पाइन्छ । वि. सं. २००८ असार १ गते पब्लिक सर्भिस कमिसनको नामबाट स्थापित यो संस्थाको गठन, काम कर्तव्य र अधिकार क्षेत्र वर्तमान संविधानमा प्रष्ट रूपमा उल्लेख छ । निजामती सेवाका पदमा नियुक्तिका लागि उपयुक्त उम्मेदवार छनोट गर्न परीक्षा सञ्चालन गर्नु लोकसेवा आयोगको कर्तव्य हुने उल्लेख छ । वर्तमान संविधानले यसको कार्यक्षेत्रलाई अझ व्यापक बनाउँदा यसको विश्वसनीयता र निष्पक्षतालाई झल्काउँछ । निजामती सेवाको पदबाहेक नेपाली सेना, नेपाल प्रहरी, सशस्त्र प्रहरी बल, नेपाल, अन्य सङ्घीय सरकारी सेवा र सङ्गठित संस्थाको पदमा पदपूर्तिका लागि लिइने लिखित परीक्षा सञ्चालन गर्ने जिम्मेवारी वर्तमान संविधानले थपेको छ । यसका साथै नेपाल सरकारबाट निवृत्तिभरण पाउने कुनै पनि पदमा आयोगको परामर्शविना स्थायी नियुक्ति नगरिने व्यवस्था नेपालको संविधानको धारा २४३ को उपधारा ५ मा उल्लेख गरी यसलाई थप जिम्मेवार बनाएको पाइन्छ ।