फागुन १२, काठमाडौं । एनएमबि म्युचुअल फण्ड अन्तर्गत सञ्चालित एनएमबि फिफ्टीको माघ मसान्तसम्म धितोपत्रमा भएको लगानीको लागत मूल्यभन्दा बजार मूल्य बढी रहेको छ ।
योजनाले सार्वजनिक गरेको माघ मसान्तसम्मको खुद सम्पत्ति मूल्य सम्बन्धी विवरण अनुसार माघ मसान्तसम्म योजनाले धितोपत्रमा धितोपत्र दलाल कमिशन सहित रू. १ अर्ब १९ करोड १६ लाख ४१ हजार लगानी गरेको छ । यो लागतको बजार मूल्य भने रू. १ अर्ब ४८ करोड ३३ लाख १४ हजार छ ।
योजनाले बैंक मुद्दती निक्षेपमा रू. १८ करोड ७५ लाख लगानी गरेको छ । बैंक मुद्दती निक्षेप सहित योजनको धितोपत्र तथा अन्य लगानीको मूल्य रू. १ अर्ब ६७ करोड ८ लाख १४ हजार छ । यो मूल्य पुस महीनाको तुलनामा भने घटेको हो । पुस महीनामा योजनको धितोपत्र तथा अन्य लगानीको मूल्य रू. १ अर्ब ७५ करोड ५२ लाख थियो ।
बन्दुमुखी प्रकृतिको यस योजनाले १२ करोड ५० लाख इकाई जारी गरेको थियो । माघ मसान्तसम्म योजनाको प्रतिइकाई खुद सम्पत्ति मूल्य रू. १६ दशमलव शून्य ७ छ । पुस मसान्तसम्म यो मूल्य रू. १६ दशमलव ५० रहेको थियो ।
पुस मसान्तसम्म रू. ६ करोड ७४ लाख १७ हजार नाफा गरेको योजनाले माघ मसान्तसम्म भने रू. १ करोड ३० लाख ९५ हजार नाफा गरेको छ । पुस महिनाकोभन्दा माघ महीनामा जम्मा आम्दानी घटेको र खर्च बढेको कारण योजनाको नाफामा कमी आएको हो ।
पुस मसान्तसम्म रू. ८ करोड ६५ लाखभन्दा बढी आम्दानी गरेको योजनाले माघ मसान्तसम्म रू. ३ करोड ५४ लाखभन्दा बढी मात्र आम्दानी गरेको हो । खर्च भने पुस मसान्तसम्म रू. १ करोड ९१ लाखभन्दा बढी मात्र भएकोमा माघ मसान्तसम्म रू. २ करोड २३ लाखभन्दा बढी खर्च भएको छ ।