वैशाख १०, टीकापुर । कैलालीको सत्ती भन्सार कार्यालय खक्रौलाले नौ महीनामै भन्सार राजस्व लक्ष्यभन्दा दोब्बर संकलन गरेको छ । कार्यालयले आर्थिक वर्ष २०७७/ ७८ को साउनदेखि चैत मसान्तसम्म लक्ष्यभन्दा ३५ प्रतिशत बढी राजस्व संकलन गरेको छ ।
कार्यालयलाई भन्सार विभागले आर्थिक वर्षको शुरुमा ६ करोड ७ लाख रुपैयाँ राजस्व उठाउने वार्षिक लक्ष्य दिएको थियो । त्यो लक्ष्य पहिलो चौमासिकमै पूरा भएपछि थप ८ करोड रुपैयाँ बढाएर १४ करोड रुपैयाँ राजस्व उठाउनुपर्ने वार्षिक लक्ष्य तोकेको थियो ।
चैत मसान्तसम्म ९ करोड ७१ लाख रुपैयाँ राजस्व उठाउने लक्ष्य दिएकामा १३ करोड १६ लाख राजस्व संकलन भएको भन्सार प्रमुख विमलकुमार शाहले बताए।
पछिल्लो समय खक्रौला नाका भएर कच्चा पदार्थ आयात भइरहेकाले पनि भन्सार कार्यालयको राजस्व वृद्धि भएको प्रमुख शाहको भनाइ छ । उता धनगढीस्थित कैलाली भन्सार कार्यालयले पनि नौ महीनामा लक्ष्यभन्दा बढी राजस्व संकलन गरेको छ ।
साउनदेखि चैत मसान्तसम्म ५ अर्ब ९७ करोड रुपैयाँ राजस्व उठाउने लक्ष्य लिएकामा ६ अर्ब ९२ करोड रुपैयाँ राजस्व उठेको कैलाली भन्सार कार्यालयका भन्सार अधिकृत फडेन्द्र खतिवडाले जानकारी दिए।
सरकारले सीमा नाकामा रहेका राजस्व कार्यालयलाई व्यवस्थित गरी भन्सार छली हुने क्रियाकलाप नियन्त्रण गर्न सके राजस्व संकलनमा अझै वृद्धि हुने स्थानीयवासीको भनाइ छ । रासस