काठमाडौं (अस) । नेकपा एमाले निकट नेपाल ट्रेड युनियन महासंघ (जीफन्ट)बाट विद्रोह गरेका श्रमिक तथा नेताहरूले नयाँ ट्रेड युनियन महासंघको घोषणा गरेका छन् । नेकपा एकीकृत समाजवादी पार्टीको शुभेच्छुक संगठनको रूपमा एकीकृत ट्रेड युनियन महासंघ (आईसीटीयू) शुक्रवार घोषणा गरिएको हो ।
महासंघको नेतृत्व विष्णुप्रसाद लम्सालले गरेका छन् । यस्तै, उपाध्यक्षमा जनार्दनबाबु कट्टेल, त्रिविक्रम ज्ञवाली, दिनेश राई, महासचिवमा दिपक कुमार पौडेल, उपमहासचिवमा रामनरेश सिंह, सुनिता थापालगायत केन्द्रीय समिति ५१ सदस्यीय रहेको छ ।
महासंघ घोषणा सभामा पार्टी अध्यक्ष माधवकुमार नेपालले अन्यभन्दा फरक तवरले महासंघलाई उभ्याउन आग्रह गरे । त्यसका लागि आफूले आवश्यक सहयोग गर्ने प्रतिबद्धता पनि उनले व्यक्त गरे ।
यस्तै श्रम, रोजगार तथा सामाजिक सुरक्षामन्त्री तथा एकीकृत समाजवादीका नेता कृष्णकुमार श्रेष्ठले केही महीनाभित्रै नेपाल ट्रेड युनियनभन्दा एकीकृत ट्रेड युनियन महासंघ नेपाल ठूलो बन्ने दाबी गरे । एकीकृत ट्रेड युनियन महासंघ नेपालका अध्यक्ष लम्सालले श्रमिक वर्गको हितका लागि महासंघ दृढतापूर्वक उभिने बताए ।