काठमाडौं । इटालीको रोम चेम्बर अफ कमर्श एन्ड इन्डस्ट्री र मिलान चेम्बर अफ कमर्श एन्ड इन्डस्ट्रीका पदाधिकारीहरूले नेपालमा लगानी गर्ने प्रतिबद्धता जनाएका छन् ।
नेपाल इटाली चेम्बर अफ कमर्श (एनआईसीसीआई)का अध्यक्ष सञ्जय अग्रवाल नेतृत्वको नेपाली प्रतिनिधिमण्डलसँगको छुट्टाछुट्टै भेटमा चेम्बर अफ कमर्श एन्ड इन्डस्ट्रीका पदाधिकारीहरूले उक्त प्रतिबद्धता जनाएका हुन् ।
उक्त प्रतिनिधिमण्डलले गत भदौ १७–२३ सम्म इटालीको भ्रमण गरेको थियो । एनआईसीसीआईको लागि द्विपक्षीय सम्बन्धबारे छलफल गर्न र व्यापारका अवसरहरूको सम्भाव्यता अध्ययन गर्र्न उक्त भ्रमण गरिएको बताइएको छ । साथै नेपाल र इटालीबीच व्यापारिक र सांस्कृतिक सम्बन्ध निर्माण र विस्तारमा भ्रमण केन्द्रित रहेको एनआईसीसीआईद्वारा जारी प्रेस विज्ञप्तिमा उल्लेख गरिएको छ ।
रोम चेम्बर अफ कमर्श एन्ड इन्डस्ट्री र मिलान चेम्बर अफ कमर्श एन्ड इन्डस्ट्री व्यावसायिक सहयोगका लागि प्रख्यात छन् ।
भ्रमणका क्रममा एनआईसीसीआईको प्रनिनिधिमण्डलले रोमस्थित नेपालका लागि महावाणिज्य दूत पाओलो नुगारीसँग पनि छलफल गरेको थियो । सो अवसरमा उनले एनआईसीसीलाई इटाली सरकारको मान्यता दिलाउन सहयोग गर्ने प्रतिज्ञा गरेको विज्ञप्तिमा उल्लेख गरिएको छ ।
नेपालमा विदेशी लगानी भित्र्याउन सरकारले चासो नदेखाएपछि आफूहरू सक्रिय भएको एनआईसीसीआईका अध्यक्ष अग्रवालले बताए ।
महावाणिज्य दूत नुगाराीले नै रोम चेम्बर अफ कमर्श एन्ड इन्डस्ट्री र मिलान चेम्बर अफ कमर्श एन्ड इन्डस्ट्रीका पदाधिकारीहरूसँग भेटको व्यवस्था मिलाइदिएको एनआईसीसीआईका अध्यक्ष अग्रवाल बताए ।
