जेठ ११, काठमाडौं । मर्जरका कारण २०७८ साल वैशाख ३१ गतेदेखि रोक्का रहेको नेपाल इन्भेष्टमेन्ट बैंक लिमिटेडको शेयर कारोबार सुचारु हुने भएको छ ।
नेपाल राष्ट्र बैंकले नेपाल स्टक एक्सचेञ्ज (नेप्से) लाई बैंकको आधारभूत शेयरधनीहरु बाहेकको शेयर कारोबार सुचारु गराउन निर्देशन दिएसँगै नेप्सेले प्रक्रिया अघि बढाएको हो ।
नेप्सेका सूचना अधिकारी मुराहरी पराजुलीले राष्ट्र बैंकको निर्देशन बमोजिम आधारभूत शेयरधनीहरुको मात्र शेयर कारोबार रोक्का हुने व्यवस्था मिलाउन सिडिएस एण्ड क्लियरिङ लिमिटेडलाई पत्राचार गरिसकिएको बताए ।
भोलिदेखिनै कारोबार सुचारु हुन्छ त ? भन्ने प्रश्नमा पराजुलीले सिडिएससीले उक्त काम सम्पन्न गरेपश्चात मात्र कारोबार सुचारु गरिने जानकारी दिए ।
नेपाल इन्भेष्टमेन्ट बैंकसँग मर्जरकै कारण सोही दिनदेखि रोक्का रहेको हिमालयन बैंक लिमिटेडको शेयर कारोबार सुचारु हुने अन्योलता भने अझै कायम रहेको छ । पराजुलीले एकै दिन दुवै कम्पनीको शेयर कारोबार रोक्का भएपनि राष्ट्र बैंकले नेपाल इन्भेष्टमेन्ट बैंकको मात्र शेयर कारोबार सुचारु गर्न पत्राचार गरेको बताएका छन् ।
नेपाल इन्भेष्टमेन्ट बैंक र हिमालयन बैंक बीचको २०७८ साल वैशाख ३० गते भएको मर्जर सम्झौता हिमालयन बैंकले अस्वीकृत गरेको हो । हिमालयन बैंकको पुस ३० गतेको वार्षिक साधारण सभाले मर्जरमा जाने प्रस्ताव अस्वीकृत गरेको थियो ।
यी दुई बैंकबीच एक बराबर एक शेयर आदानप्रदान गर्ने सहमति अनुसार मर्जरमा जाने सम्झौता भएको थियो । तर, हिमालयन बैंकको वार्षिक साधारण सभामा मर्जरको पक्षमा ४३ दशमलव ६३ प्रतिशत मात्र मत प्राप्त भएको थियो ।
सभाका लागि तय गरिएको विशेष प्रस्तावमा उल्लेखित मर्जर सम्बन्धमा उपस्थित शेयरधनीहरुमध्ये ७५ प्रतिशत शेयरको प्रतिनिधित्व गर्ने शेयरधनीहरुले प्रस्तावको पक्षमा मत दिएमा मात्र सो प्रस्ताव सभाद्वारा स्वीकृत हुने व्यवस्था थियो ।
यसर्थ हिमालयन बैंकको वार्षिक साधारण सभामा मर्जर पक्षमा आवश्यक ७५ प्रतिशत मत नपुगेका कारण उक्त प्रस्ताव अस्वीकृत भएको थियो । हिमालयन बैंकले मर्जर प्रस्ताव सभाबाट अस्वीकृत गरेसँगै नेपाल इन्भेष्टमेन्ट बैंकले माघ ४ गते सम्पन्न विशेष साधारण सभामार्फत मर्जर प्रस्ताव रद्द गरेको थियो ।
