चैत १४, काठमाडौं । नबिल म्युचुअल फण्ड अन्तर्गत सञ्चालित नबिल ब्यालेन्सड् फण्ड–२ फागुन मसान्तसम्म रू. ९ करोड ३७ लाखभन्दा बढी नोक्सानीमा रहेको छ ।
माघ महीनाको तुलनामा फण्डको नोक्सानी बढेको हो । माघ मसान्तसम्म फण्ड रू. १ करोड ३१ लाखभन्दा बढी नोक्सानीमा रहेको थियो ।
फागुन महीनामा फण्डको आम्दानी रू. ७ करोड ३३ लाखभन्दा बढी ऋणात्मक हुँदा नोक्सानी बढेको हो । माघ महीनामा यस फण्डले रू. ४९ लाख २२ हजार नाफा गरेको थियो ।
फागुन मसान्तसम्म फण्डले धितोपत्रमा गरेको लगानीको परलमूल्य धितोपत्र दलाल कमिशन सहित रू. १ अर्ब २६ करोडभन्दा बढी रहेको छ । फण्डको लगानीको बजारमूल्य भने रू. १ अर्ब ३७ करोडभन्दा बढी रहेको छ । फण्डले धितोपत्रमा गरेको लगानीको लागतमूल्य भन्दा बजारमूल्य भने बढी रहेको छ ।
१० वर्षे अवधिको बन्दमुखी प्रकृतिको यस फण्डले ११ करोड २० लाख इकाई जारी गरेको हो । फण्डको प्रति इकाई खुद सम्पत्ति मूल्य फागुन महीनामा रू. १३ दशमलव २१ रहेको छ । माघ महीनामा यो मूल्य रू. १३ दशमलव ९३ रहेको छ ।