‘कर्जा प्रवाह अनुसार आर्थिक वृद्धि नहुनुमा निजीक्षेत्र मात्र दोषी छैन’

काठमाडौं। नेपाल उद्योग वाणिज्य महासंघका अध्यक्ष चन्द्रप्रसाद ढकालले कर्जा प्रवाह अनुसार आर्थिक वृद्धि नहुनुमा निजीक्षेत्र मात्र दोषी नभएको बताएका छन् । महासंघमा नयाँ नेतृत्वको १०० दिन पूरा भएको अवसरमा बिहीवार आयोजित कार्यक्रममा उनले कर्जा विस्तारको तुलनामा आर्थिक वृद्धि नहुनुमा सबै क्षेत्र दोषी रहेको भन्दै यसका कारण पत्ता लगाउन विस्तृत अध्ययन आवश्यक रहेको औंल्याए । ‘अहिले कर्जा प्रवाह अनुसार आर्थिक विस्तार नहुनुमा निजीक्षेत्रले दुरुपयोग गरेको जस्तो व्यवहार गरिँदै छ,’ अध्यक्ष ढकालले भने, ‘यसमा ऋणी मात्र दोषी हुन् ? यसको मार निजीक्षेत्रलाई मात्र पार्न मिल्छ ?’ समस्यामा रहेका व्यवसायीलाई सरकारले दोष लगाउन नमिल्ने उनको तर्क थियो । यसमा सबै पक्षबाट कमी कमजोरी भएको र मिलेर समस्या समाधान गनुपर्नेमा उनले जोड दिए । उनले निजीक्षेत्रलाई आफ्नो ऋण व्यवस्थापनका लागि समय दिन आवश्यक रहेको समेत बताए । निजीक्षेत्रले व्यक्तिगत स्वार्थका लागि मात्र सुझाव नदिएको महासंघको भनाइ छ । निजीक्षेत्रले व्यक्तिगत स्वार्थका लागि मात्र सुझाव नदिएको भन्दै ढकालले त्यसको सुनुवाइ नभएको गुनासो गरे । व्यवसायीका सुझाव मौद्रिक नीतिले खासै सम्बोधन नगरेको र अब राष्ट्र बैंकको निर्देशन कुरिरहेको उनले बताए । महासंघमा नयाँ कार्यकारिणी आएसँगै विधान संशोधन प्रक्रिया अघि बढाइएको, परिषद्, समिति र फोरम गठन भइसकेको जानकारी दिँदै अध्यक्ष ढकालले मासिक कार्ययोजना अनुसार काम गर्दै जाने बताए । कार्यक्रममा महासंघका वरिष्ठ उपाध्यक्ष अञ्जन श्रेष्ठले सरकार र राष्ट्र बैंकले निजीक्षेत्रको माग बेवास्ता गरेको गुनासो गरे । बजेट र मौद्रिक नीतिमा सुझाव पठाए पनि व्यवसायीका जायज माग समेत सम्बोधन नभएको उनले बताए ।